Aye Waqt!

Kya tera jee nahin chaahta kabhi rukkne ka kahin?

Kya tu iss musalsal naukri se thakta nahin?

Kabse chalta ja raha hai...

Zara thheher ja, pagal!

Main baithhi hoon ek dost ke saath.

Tu bhi baithh ja yahin.

Teri saans phool rahi hai,

Aankhein jhool rahi hain,

Lag raha hai badla sa,

Kitna dubla patla sa...

Aisa kaisa bikhra hai haal?

Zara apni sehat sambhaal!

Yeh le chai, ab tu farmaa aaram.

Logon se kar thodi duaa-salaam.

Kya kaha?

Duty kaun karega?

Tere badle kaun chalega?

Main chalti hoon naa!

Iss dost ke saath.

Haathon mein haath.

Yun hi chalte rahenge hum...

Tu rukk ja, waqt, yahin tham ja!

Humein yun hi chalne de, samjha?