Bombay mein bhagwaan mil sakta hai. Us se bhi mushkil hai uss bhagwaan ko aur khud ko rakhne ke liye makaan milna. Woh bhi chalo mehnat aur qismat ki jugalbandhi se shaayad mil jaaye. Kuch mushkil se hi sahi, zara ghoom-phir ke hi sahi, kuch pyaari si sadakein mil sakti hain jinpar dono or ped lage hon.
Lekin! Kisi bhi sadak par, kisi bhi waqt, aasaani se ek rickshaa milna - naa-mumm-kinn!
 |
| Image Credits - Somesh Kumar somesh.kumar.blogspot.in |
In nakchadhhi rickshaaon se behadd bezaar thi Nupur, jo aadhe ghante se beech-raste par kabhi iss bhaiyya se toh kabhi uss bhaiyya se “Versova?” poochh rahi thi. Aakhir mein ik chahcha ne badi nazaakat se apni rickshaa dheemi ki – rukaayi nahin – dheemi ki, jaise koi ladki kisi ladke ki feelings ke saath khilvaad kar rahi ho.
Nupur ka gussa iss waqt tak itna badhh chukaa tha ki ki woh tez raftaar mein jaati hui Rajdhani Express bhi pakad leti, to iss chacha ki dheemi rickshaa kya cheez hai! Teen-chaar kadam daud kar woh uss rengti hui rickshaw mein ghuskar aise baithh gayi, maano seat uska sinhaasan ho, aur rickshaa-wale se gurraa kar “Versova!” kahaa jaise apne naukar se chai maang rahi ho.
Chacha apni chaturaayi ka chaupat hote dekh naa paye. Aise binaa poochhe unki Dhanno-samaan rickshaa mein baithhne ki himmat kaise hui uski! Dono aise ladey, maano gaaliyon ki raas-leela ho rahi ho. Nupur ne faislaa kar liya. Who jaayegi bhi issi rickshaa se, aur dunyaa ke tamaam rickshaa-waalon ki harkarton ka collective badlaa lete hue, iss chacha ko binaa paise diye bhaag jaayegi!
Haan haan, yeh ladki aisi paagalon wali harkatein karne ki poori qaabiliyat rakhti thi. Ek baar shart jeetne ke liye ussne cold-drink van se ek Pepsi churaa li thi. Film dekh kar binaa ticket ke baazu wali screen mein ghus jaana uski favorite cheating thi! Yahaan tak ki uske bachpan ki bell bajaakar bhaag jaane wali aadat aajtak durust thi!
Haar maankar badbadiye chacha ne rickshaa chaalu ki aur meter down kiya. Agle signal par jab rickshaa ruki, tab Nupur ki nazar right-side wale aaine par gayi aur uska mood fatt se achha ho gaya! Baaki dinon bedhhangi ghoomne wali Nupur, aaj full Eid Mubaarak ban kar nikli thi – pink salvaar kameez, gold kolhapuri chappal, uski badi si black bag, jismein who apni saari qaaynaat lekar ghoomti thi, aur woh white wallet jo usne Varun ke saath khareeda tha. Unke rishte ki doosri saalgirah thi uss din, aur Varun usse woh wallet gift kar raha tha. Select karte waqt waise unki pasand mein fark aaya tha, as usual, aur as usual, Varun ne usse chidhhaate hue kahaa, “Haan haan, tumko jo thheek lage. Waise bhi tumhaari hi toh chalti hai hamesha!” Aur phir salesman ki taraf muddke, “ Kyun bhai, sahi hai naa?” Aur salesman bhi kum nahin! Bola, “Haan bhai, auraton ka zamaana hai. Unke saamne kahaan apni koi majaal.” Agar Filmfare mein over-acting ke liye nomination hote, toh Oscar pakka uss hi ko milta!
Aaj uss din ko thheek ek saal hua tha, aur aaj subah bhi Varun ne phone par usse sataate hue kahaa,“Haan meri maa! Meri kabhi chali hai kya?” Aaj ka masla yeh tha, ki Varun ko apne favorite director ki nayi film ‘Ek Chaandni Raat’ dekhne jaana tha, aur Nupur ko ghar hi par kuch achha waqt bitaakar celebrate karna tha. Lekin nahin, aaj subah usne thhaan li thi ki woh Varun ko surprise dekar galat saabit karegi aur usse apna mannpasand dialogue phirse maarne ka mauka nahin degi. Isliye woh theatre gayi, aur naseeb uska ki usse aakhri do tickets mil gayi! Lekin naseeb uska ki usse wahaan se rickshaw milne mein itni der ho ho gayi. Varun kabse intezaar kar raha tha uska... magar usne socha, koi baat nahin, tickets dekhkar bahot khush ho jaayega.
Chidchide chacha ne gusse se “yahaan se kidhar?” poochhkar Nupur ke khayaalon ko disturb kiya aur usse apna bhaag jaane wala plan yaad dilaa diya! “Umm.. right lekar pehle uss gate pe zara ek minute rok dijiye, main ek kaam niptaakar aati hoon, phir yahaan se aage chalna hai.”
Naa toh aage chalna tha, aur naa hi Nupur ka waapas aane ka koi iraada tha. Building ke andar jaake seedha Varun ke ghar chali gayi. Waise, iraada toh apne chacha ka bhi nahin tha rukkne ka, kyunki aaine mein unko Nupur ka wallet dikh gaya jo who bhool gayi thi - Woh wallet jo gift tha! Woh wallet jismein gift thi! Sham ke show ki do aakhri tickets.
Phir kya! Un dono ne gharpe saara din ek-duusre ke saath waqt bitaaya, aur Varun Nupur ko chidhhaata raha ki hamesha ussi ki chalti hai. Shaamko jab woh dono balcony mein khade sunset dekh rahe the, tab balcony ki do seat mein baithhe apne chacha apni chachi ko ‘Ek Chaandni Raat’ dikha rahe the.
